हरिपुर्वा नगरपालिकामा तालाबन्दी, नगर प्रमुखमाथि भ्रष्टाचार र अनियमितताको आरोप

 

मधेशदूत समाचारदाता
सर्लाही, असार २

    हरिपुरवा नगरपालिकाका नगर प्रमुखले भ्रष्टाचार, अनियमितता, चरम लापरवाही तथा युवामाथि ज्यादती गरेको आरोप लगाउँदै सर्वदलीय संघर्ष समिति तथा हरिपुर्वा नगरपालिका सम्पूर्ण युवाहरुले मंगलबार  नगरपालिकामा तालाबन्दी गरेका छन्।
    समितिले जारी गरेको प्रेस विज्ञप्तिमा नगरपालिकामा सुशासन, पारदर्शिता तथा जनउत्तरदायित्व कायम गराउन बाध्य भएर आन्दोलनका कार्यक्रम सञ्चालन गरिएको उल्लेख गरिएको छ। पटक–पटक सम्बन्धित निकायको ध्यानाकर्षण गराउँदा पनि कुनै सुनुवाइ नभएको तथा जनभावनाविपरीत गतिविधि जारी रहेकाले तालाबन्दी गर्नुपरेको उनीहरूको भनाइ छ।

   विज्ञप्ति मार्फत नगरपालिकाका हालसम्म सञ्चालन भएका विभिन्न कार्यक्रम तथा योजनाको कार्यान्वयन विवरण सार्वजनिक गर्न, लेखापरीक्षण प्रतिवेदनमा उल्लेख भएका अनियमितता तथा बेरुजु सम्बन्धी कारबाहीको प्रगति विवरण सार्वजनिक गर्न माग गरिएको छ।
त्यस्तै, प्रशासनिक भवन निर्माणका लागि नेपाल सरकारबाट चालु आर्थिक वर्ष २०८२/८३ मा विनियोजित बजेटको प्रगति विवरण सार्वजनिक गर्न, सार्वजनिक खरिद प्रक्रियाको छानबिन गरी नगरपालिकाले सञ्चालन गरेका योजना तथा कार्यक्रमको मूल्याङ्कन गर्न तथा नगरपालिकाको समग्र आर्थिक गतिविधिको विवरण सार्वजनिक गर्न पनि माग गरिएको छ।
    समितिले अनियमिततामा संलग्न दोषीमाथि कानुनी कारबाही गर्न, नगरपालिकामा सुशासन, पारदर्शिता र जनउत्तरदायित्व सुनिश्चित गर्न समेत माग गरेका छन्।
   साथै  सम्बन्धित निकायलाई यथाशीघ्र समस्याको समाधान गर्न आग्रह गर्दै माग सम्बोधन नभए थप सशक्त आन्दोलनका कार्यक्रम सार्वजनिक गरिने चेतावनी दिएका छन्।