सडकमै कृषि बाली सुकाउँदा दुर्घटनाको जोखिम बढ्दो मलंगवा–बयलबास सडकखण्डको क्षेत्रमा सार्वजनिक बाटोको दुरुपयोग

 

मनोज यादव
सर्लाही, बैशाख २८

   सर्लाहीको ब्रम्हपुरी गाउँपालिकाहुँदै बयलबासतर्फ जाने व्यस्त सडकखण्ड अन्तर्गतको क्षेत्रमा पछिल्ला दिनहरूमा सडकमै ठूलो परिमाणमा मकै लगायतका कृषि बाली सुकाउने कार्य भइरहेको देखिएको छ। स्थानीय कृषकहरूले सडकको अधिकांश भाग ओगटेर मकै सुकाउने गरेका कारण सवारी आवागमन प्रभावित हुनुका साथै दुर्घटनाको जोखिम समेत बढेको छ।
   स्थानीयका अनुसार बिहानदेखि साँझसम्म सडकमा मकै सुकाइँदा साना तथा ठूला सवारीसाधनलाई आवतजावत गर्न कठिन हुने गरेको छ। विशेषगरी मोटरसाइकल चालकहरू चिप्लिने तथा नियन्त्रण गुमाउने जोखिममा रहने गरेका छन्। सडकको बीच भागसम्म मकै फैलाइँदा दुईतर्फी सवारी सञ्चालनमा समेत समस्या देखिएको स्थानीयवासी बताउँछन्।
   उक्त  क्षेत्र ग्रामीण कृषि उत्पादनको प्रमुख केन्द्र मानिए पनि सार्वजनिक सडकलाई नै कृषि उपज सुकाउने स्थान बनाउनु गलत अभ्यास भएको स्थानीय बुद्धिजीवीहरूको भनाइ छ। “सार्वजनिक बाटो सबै नागरिकको साझा सम्पत्ति हो, यसलाई व्यक्तिगत प्रयोजनका लागि प्रयोग गर्दा अरूलाई असर पर्छ,” एक स्थानीयले बताए।
   स्थानीयवासीका अनुसार यसअघि पनि यस्तै कारणले विभिन्न समयमा सवारी दुर्घटना भइसकेका छन्। सडकमा फैलाइएको मकैमाथि गुड्दा मोटरसाइकल अनियन्त्रित हुने, रातिको समयमा मकै नदेखिँदा दुर्घटना हुने तथा आकस्मिक सवारी सञ्चालनमा समस्या पर्ने गरेको गुनासो छ।
  सडक सुरक्षा संवेदनशील विषय भएकाले सम्बन्धित स्थानीय तह, प्रहरी प्रशासन तथा नियमन निकायले तत्काल ध्यान दिनुपर्ने स्थानीयको माग छ। कृषकलाई बाली सुकाउन वैकल्पिक सुरक्षित स्थानको व्यवस्था गर्न तथा सार्वजनिक सडक दुरुपयोग रोक्न आवश्यक जनचेतना र निगरानी बढाउनुपर्ने उनीहरूको भनाइ छ।
   सार्वजनिक संरचना सुरक्षित र व्यवस्थित राख्नु सबै नागरिकको साझा दायित्व भएकाले सडकलाई सुरक्षित रूपमा प्रयोग गर्न सरोकारवालाले आग्रह गरेका छन्।