सर्लाहीमा साना किसान सहकारीको उदाहरणीय पहल : साइलेज उद्योगबाट किसानलाई दोहोरो फाइदा

 

मधेशदूत समाचारदाता---
सर्लाही,बैशाख १६

   सर्लाहीको हरिपुर नगरपालिका–२ मा रहेको साना किसान कृषि सहकारी संस्था लिमिटेडले किसान लक्षित साइलेज (पशु आहार) उत्पादन उद्योग सञ्चालनमा ल्याएर सकारात्मक उदाहरण प्रस्तुत गरेको छ। सहकारीसम्बन्धी नकारात्मक खबरहरूबीच यो पहलले उत्पादनमूलक काममार्फत आशाको सन्देश दिएको छ।
उद्योग सञ्चालनपछि स्थानीय किसान प्रत्यक्ष लाभान्वित भएका छन्। पहिले खेर जाने मकैको हरियो बोट, डाँठ तथा घाँस अहिले उद्योगका लागि कच्चा पदार्थ बनेका छन्। सहकारीले यी सामग्री किसानसँग प्रति किलो ४ रुपैयाँका दरले खरिद गर्दै आएको छ, जसले किसानलाई अतिरिक्त आम्दानीको अवसर दिएको छ।
संकलित कच्चा पदार्थ प्रशोधन गरेर तयार गरिने साइलेज दाना प्रति किलो ११ रुपैयाँमा बिक्री गर्ने योजना रहेको छ। यसले एकातिर किसानलाई आम्दानी दिने र अर्कोतिर पशुपालकलाई सस्तो तथा गुणस्तरीय आहार उपलब्ध गराउने काम गरिरहेको छ।
करिब ८० लाख रुपैयाँ लागतमा स्थापना गरिएको उद्योगमा ७० प्रतिशत अनुदान वन तथा सहज कार्यक्रममार्फत आएको छ भने बाँकी ३० प्रतिशत सहकारीले लगानी गरेको छ। सहकारीका व्यवस्थापक नरेन्द्र कुमार चौधरीका अनुसार उत्पादन भएको साइलेज पहिलो प्राथमिकतामा स्थानीय किसानलाई उपलब्ध गराइनेछ।
उद्योग सञ्चालनसँगै पशुपालन गर्ने किसानलाई वर्षभरि सस्तो र गुणस्तरीय आहार उपलब्ध हुन थालेको छ। यसले दूध उत्पादन लागत घटाउने र उत्पादन वृद्धि गर्ने अपेक्षा गरिएको छ। पशु प्राविधिक रमेश चौधरीका अनुसार साइलेज प्रयोगले पशु स्वास्थ्य सुधार, दूध उत्पादन वृद्धि र किसानको आम्दानी बढाउन सहयोग पुग्ने देखिएको छ।
यस पहलले पशुपालन व्यवसायलाई थप व्यावसायिक बनाउन प्रेरित गरेको छ। आहार अभावका कारण विस्तार हुन नसकेको पशुपालन अब विस्तारतर्फ उन्मुख भएको छ। साथै, ग्रामीण क्षेत्रमा रोजगारी र आयआर्जनका नयाँ सम्भावनाहरू पनि सिर्जना भएका छन्।
सहकारीमा हाल १,२८८ जना सेयर सदस्य छन्, जसमा १,२११ जना महिला रहेका छन्। सहकारीको कुल पूँजी ४६ करोड ५८ लाख रुपैयाँभन्दा बढी रहेको छ, जसले यसको आर्थिक सुदृढता झल्काउँछ।
   यसैबीच, सहकारीको करिब २ करोड ६७ लाख रुपैयाँ लागतमा निर्माण गरिएको नयाँ आधुनिक भवन पनि उद्घाटन गरिएको छ। नगर प्रमुख गोपाल पंजियारले भवन उद्घाटन गर्नुभएको हो, जसमा हरिपुर नगरपालिकाले २० लाख रुपैयाँ सहयोग गरेको छ।
नयाँ भवन सञ्चालनमा आएपछि सहकारीका सेवा थप प्रभावकारी हुने अपेक्षा गरिएको छ। किसानहरूले अब ऋण, बचत, तालिम र कृषि परामर्श सेवा एउटै स्थानबाट सहज रूपमा पाउने भएका छन्। सहकारीले पहिलो चरणमा १२ जना किसानलाई उद्यमी बनाइसकेको जनाएको छ।
   साइलेज उत्पादन उद्योगले खेर जाने स्रोतको सदुपयोग, किसानको आम्दानी वृद्धि र पशुपालन व्यवसायको दिगो विकासमा महत्वपूर्ण योगदान पुर्‍याएको छ। यस्ता किसानमैत्री योजनालाई विस्तार गर्न सके ग्रामीण अर्थतन्त्र अझ मजबुत बन्ने देखिन्छ।