मिर्जापुरमा गोठमा आगलागी,एक चौपयासहित डेढ लाख बराबरको क्षति

मधेशदूत समाचारदाता---
सर्लाही, पुस २४

सर्लाहीको बलरा नगरपालिका–६ मिर्जापुरमा बुधबार आगलागी हुँदा करिब १ लाख ४८ हजार रुपैयाँ बराबरको क्षतिसहित एउटा चौपया जलेर मरेको छ।
    जिल्ला प्रहरी कार्यालयका अनुसार बिहान करिब २ बजेको समयमा स्थानीय ५० वर्षीय नन्दलाल साहको फुस र बाँसले बनेको भैँसी गोठमा विद्युत् तार सर्ट भई आगलागी भएको छ। उक्त आगलागीबाट अन्दाजी ५ हजार मूल्य बराबरको १ क्विन्टल गहुँ र लत्ताकपडा जलेर नष्ट भएको छ। आगोले पोलेर अन्दाजी ४० हजार मुल्यको एउटा पाडी मरेको छ भने एक-एक वटा भैँसी र बाख्रा घाइते भएको प्रहरीले जानकारी दिएको छ।
   आगलागीबाट फुस र बाँसले बनेको गोठघर पूर्ण रूपमा जलेर नष्ट भएको छ, जसको अन्दाजी मूल्य रु. १ लाख रहेको छ। घटनामा मानवीय क्षति भने नभएको जनाइएको छ।
  घटनाबारे बिहान करिब साढे ४ बजे जानकारी पाउनासाथ प्रहरी चौकी अर्नाहाबाट प्रहरी सहायक निरीक्षकको कमाण्डमा खटिगएको प्रहरी टोलीले स्थानीयको सहयोगमा आगो पूर्ण रूपमा नियन्त्रणमा लिइएको जिप्रका सर्लाहीका प्रवक्ता एवं डिएसपी सरोज राईले जनाएको छ।