बढ्दो चिसोका बीच मलंगवा नगर संरक्षण तथा सुधार समितिद्वारा दाउरा वितरण

मधेशदूत समाचारदाता---
मलंगवा, पुस २३

    सर्लाहीमा शीतलहरका कारण पछिल्ला केही दिनदेखि चिसो अत्यधिक बढेपछि सर्वसाधारणको जनजीवन प्रभावित बनेको छ। बढ्दो चिसोबाट प्रत्यक्ष रूपमा प्रभावित सर्वसाधारणलाई राहत दिन मलंगवा नगर संरक्षण तथा सुधार समितिले निःशुल्क दाउरा वितरण गरेको छ। समितिले मंगलबार मलंगवा नगरपालिका वडा नं. ११ र १२ भित्रका २५ वटा सार्वजनिक स्थानमा दाउरा वितरण कार्यक्रम सञ्चालन गरेको हो। 
   चिसो मौसममा सर्वसाधारणको बढी आवत–जावत हुने चोक, चौतारा तथा अन्य सार्वजनिक स्थललाई लक्षित गरी दाउरा वितरण गरिएको समितिका अध्यक्ष चन्दन सिंहले जानकारी दिए । उनले दाउरा वितरण कार्यमा सहकार्य गरेको नेपाल भेनियर उद्योगप्रति धन्यवाद व्यक्त गरेका छन् । सार्वजनिक स्थानमा दाउरा उपलब्ध भएपछि सर्वसाधारण, बिरामीका आफन्त, ज्येष्ठ नागरिक तथा विपन्न वर्गलाई चिसोबाट राहत पुग्ने उनको भनाइ छ।

    शीतलहरको असर कायमै रहेसम्म आवश्यकताअनुसार थप स्थानमा पनि दाउरा वितरण गरिने समितिका सदस्य तथा राष्ट्रिय बजरंग दलका केन्द्रीय महामन्त्री धिरेन्द्र मिश्रले बताए ।