प्रेम विवाह गरि फरार भएका जोडीलाई नियन्त्रणमा लिन माग गर्दै हरिवनमा चक्काजाम

मनोज यादव----
सर्लाही, कात्तिक १३

   मंगलबारको दिन सर्लाहीको हरिवन बजारको अवस्था त्यति सामान्य थिएन। महेन्द्र राजमार्ग, जहाँ प्रायः सवारीको निरन्तर गडगडाहट सुनिन्छ, केही समयका लागि स्तब्ध भयो। कारण थियो एक प्रेमी जोडी, जसले समाजको मर्यादा तोड्दै प्रेम विवाह गरेर घरबाटै भाग्ने निर्णय गरेका थिए।
   बिहान करिब आधाघण्टासम्म किशोरी पक्षका अभिभावक र आफन्तहरूले महेन्द्र राजमार्गमा चक्काजाम गरेका थिए । उनीहरूको माग स्पष्ट थियो “भागेका जोडीलाई तत्काल नियन्त्रणमा लिनुपर्छ।” स्थानीय इलाका प्रहरी कार्यालय हरिवनका अनुसार उक्त जोडी गत कात्तिक ४ गतेदेखि हराइरहेका छन्। युवकको उमेर १९ वर्ष र किशोरीको १८ वर्ष भएकाले कानुनले यसलाई बालविवाह को दायरामा राखेको छ। यही कानूनी आधारमा किशोरीका परिवारले प्रहरीलाई दबाब दिएका छन्।
   प्रहरीले भागेका प्रेमी–प्रेमिकाको खोजीका लागि सक्रियता बढाएको जनाएको छ। “हामीले सम्भावित सबै स्थानमा खोजी गरिरहेका छौं,” इलाका प्रहरी प्रमुखले भने, “तर उनीहरू सीमापार भारततर्फ गएको आशंका छ।”
भारतको बिहारमा यसबेला चुनावी माहोल तातिरहेको हुँदा, सहयोगका लागि भारतीय सुरक्षाकर्मीलाई सम्पर्क गर्न पनि कठिन भएको प्रहरी स्रोतले जनाएको छ ।
   तर, घटनाले हरिवनका स्थानीयलाई दुई धारमा बाँडेको छ। केहीले अभिभावकहरूको पीडालाई न्यायोचित ठहर गरे पनि कतिपयले राजमार्ग अवरुद्ध गर्नु गलत अभ्यास भएको तर्क गरेका छन्। “व्यक्तिगत घरायसी विषयका कारण सार्वजनिक सडक बन्द गर्नु जनताको अधिकारमाथिको अतिक्रमण हो,” एक स्थानीय व्यापारीले भने, “यसरी दबाब दिने अभ्यासले प्रहरीमाथि पनि अनावश्यक बोझ पर्छ।”
  सामाजिक रूपमा हेर्दा, यस्ता घटनाहरूले  समाजमा प्रेम विवाहबारेको सोच अझै कित्ता बाँडिएको देखाउँछ। परम्परा र कानुनको बीचमा परेका यस्ता प्रेमी–प्रेमिकाले प्रायः समाजबाट बहिष्कृत हुनुपर्ने स्थिति भोग्नुपर्छ। अभिभावकहरू ‘इज्जत’ र ‘कानून’ बीचमा अल्झिँदा, प्रेम गर्ने जोडी सीमापार हराउँछन्। त्यो पनि कहिल्यै फर्किन नसक्ने गरी।
  हरिवनको यो घटना केवल एक ‘चक्काजाम’ मात्र होइन, समाजको पुरानो मानसिकता र नयाँ पुस्ताको स्वतन्त्र सोचबीचको टकरावको प्रतीक हो।
अब प्रश्न यो छ । के प्रहरीको खोजीले भागेका जोडीलाई भेट्टाउनेछ, वा यो प्रेमकथा सीमापारको अँध्यारोमा हराउनेछ?