प्रेम सम्बन्धको त्रासदीः रुवीको हत्यापछि आरोपी पासवानले पनि गरे आत्महत्या

 

मधेशदूत समाचारदाता
रौतहट, भदौ १२ गते।

    रौतहटमा प्रेम सम्बन्धकै विषयलाई लिएर घटेको घटनामा दुई जनाको ज्यान गएको छ । २६ वर्षीया रुवी साहको हत्या गर्ने लक्ष्मण पासवानको पनि उपचारकै क्रममा मृत्यु भएको प्रहरीले पुष्टि गरेको छ ।   गत शनिबार राति गौर–सिरसिया सडकखण्ड अन्तर्गत गौर नगरपालिका–९ मुडवालगेटस्थित सडकमा सुटकेसभित्र रुवीको शव फेला परेको थियो । गौरकै डेरामा हत्या गरी शवलाई ई–रिक्सामा राखेर सडकमा फालिएको अनुसन्धानबाट खुलेको छ ।
   हत्या अभियुक्त पासवानले आत्महत्याको प्रयास गर्नु अघि फेसबुकमा भिडियो पोष्ट गरेका थिए । सो भिडियोमा उनले रुवीको हत्या आफूले नै गरेको स्वीकार गर्दै, “रुवीलाई मारेदेखि मेरो हात काँपिरहेको छ, अब बाँचेर के गर्नु” भनेका थिए । साथै, उनीहरूले विद्यालय कालदेखि प्रेम सम्बन्ध रहेको र पछि अदालतमा गएर विवाह गरेको समेत खुलाएका छन् । तर आर्थिक समस्या र पारिवारिक दबाबका कारण यस्तो कदम चालेको उनले भिडियोमै बताएका छन् । रुवी भारतको मुजफ्फरपुर घर भएकी थिइन्। माइती रौतहटको माधवनारायण नगरपालिका–२, माधवपुरमा रहेको थियो। उनी गौरमा डेरा लिएर ४ वर्षीया छोरीलाई पढाउँदै आएकी थिइन् । लक्ष्मणको घर पनि सोही टोलमै रहेको प्रहरीले जनाएको छ ।
  पासवानले हत्या पछि नहर छेउमा शरीरमा पेट्रोल छर्की आगो लगाएका थिए। गम्भीर घाइते अवस्थामा भेटिएका उनलाई उपचारका लागि कीर्तिपुरस्थित बर्न अस्पताल लगिएको थियो । तर, बुधबार साँझ उनको पनि मृत्यु भएको जिल्ला प्रहरी कार्यालय रौतहटले जानकारी दिएको छ ।
  यस घटनाले प्रेम सम्बन्ध र पारिवारिक दबाबबीचको असन्तुलनले कसरी डरलाग्दो रूप लिन सक्छ भन्ने प्रश्न समाजमा उठाएको छ।