मलंगवामा तुल,ब्यानर तथा पोस्टर प्रशासनद्वारा हटाइए

 

AI को मद्दत बाट

मधेशदूत समाचारदाता----

 सर्लाही,फागुन १०

    यही फागुन २१ गते हुने प्रतिनिधिसभा निर्वाचन नजिकिँदै गर्दा सदरमुकाम मलंगवाका विभिन्न स्थानमा आचारसंहिता विपरीत राखिएका प्रचारप्रसारका सामग्री प्रशासनले हटाएको छ ।
    राजनीतिक दलहरूले प्रचारप्रसारका लागि आचारसंहिता विपरीत विभिन्न स्थानमा टाँसेका पर्चा, पम्पलेट, ब्यानर लगायतका सामग्री प्रहरीले हटाएका हुन् ।
   मलंगवा बजारको  विभिन्न स्थानमा दल तथा उम्मेदवारहरूले जथाभाबी आचारसंहिता विपरीत टुल, ब्यानर तथा अन्य प्रचार सामग्री टाँसेको गुनासो आएपछि  सहायक प्रमुख जिल्ला अधिकारी होम प्रसाद घिमिरेको प्रत्यक्ष निगरानीमा प्रहरीले ती सामग्री हटाएको जिल्ला प्रशासन कार्यालय सर्लाहीले जानकारी दिए ।
   जिल्ला आचारसंहिता अनुगमन समितिले जिविस चोक, पुरानो बसपार्क , बालमन्दिर चोक, नगरपालिका चोकलगायत स्थानमा अनुगमन गरी सार्वजनिक स्थलमा टाँसिएका ब्यानर तथा टुल हटाएको प्रशासनले जनाएको छ ।
    निर्वाचन आचारसंहिता विपरीत ब्यानर, टुल तथा अन्य प्रचार सामग्री टाँसिएको पाइएपछि हटाइएको अनुगमन समितिका सदस्य तथा सहायक प्रजिअ घिमिरेले बताए ।
 “निर्वाचनलाई स्वच्छ, मर्यादित र निष्पक्ष बनाउन आचारसंहिता लागु गरिए पनि केही दल र उम्मेदवारले यसको पालना नगरेको पाइएको छ,” उनले बताए ।
  सार्वजनिक स्थलमा जथाभावी ब्यानर र टुल टाँस्दा वातावरणीय प्रदूषण बढ्नुका साथै सहरको सौन्दर्यमा समेत नकारात्मक असर परेको स्थानीयहरुले बताएका छन् ।
   निर्वाचन आयोगले जारी गरेको आचारसंहितामा सार्वजनिक स्थल, सरकारी कार्यालय, धार्मिक स्थल, शैक्षिक संस्था तथा निजी सम्पत्तिमा अनुमति बिना प्रचार सामग्री राख्न नपाइने स्पष्ट व्यवस्था भए पनि केही दलहरूले उल्लङ्घन गर्दै आएको पाइएको छ ।