हरिद्वारमा नयाँ धार्मिक नेतृत्वको उदय: करौली शंकर महादेव महामण्डलेश्वरमा अभिषेक

 

मधेशदूत डेस्क ---

हरिद्वार(भारत),चैत १८

     भारतको हरिद्वारमा सम्पन्न एक महत्वपूर्ण धार्मिक समारोहले सन्त समाजमा नयाँ नेतृत्वको उदय भएको संकेत दिएको छ। श्री करौली शंकर महादेव धाम, मिश्री मठका परमाध्यक्ष करौली शंकर महादेव महाराजलाई श्री पञ्चायती अखाडा नयाँ उदासिन निर्भाना  द्वारा महामण्डलेश्वर पदमा अभिषेक गरिएको हो।
   यो अभिषेकलाई केवल पद प्रदान गर्ने औपचारिकता मात्र नभई, हिन्दू सन्त परम्परामा नयाँ जिम्मेवारी हस्तान्तरणको रूपमा पनि हेरिएको छ। समारोहमा विभिन्न अखाडाका सन्त–महन्त, धार्मिक अगुवा तथा गणमान्य व्यक्तिहरूको व्यापक सहभागिता रहेको थियो।
   

वैदिक विधिअनुसार सम्पन्न अभिषेकमा अखाडाका शीर्ष पदाधिकारीहरूले तिलक, चादर अर्पण तथा धार्मिक अनुष्ठानमार्फत नयाँ महामण्डलेश्वरलाई औपचारिक मान्यता दिएका थिए। कार्यक्रममा वक्ताहरूले करौली शंकर महादेवलाई योग, ध्यान, मन्त्र दीक्षा र आध्यात्मिक अभ्यासमार्फत समाजलाई मार्गदर्शन गर्ने सक्षम सन्तका रूपमा चित्रण गरेका थिए।

   वक्ताहरूले विशेष गरी उनको भूमिकालाई परम्परा संरक्षण र आधुनिक समाजबीच सन्तुलन कायम गर्ने सेतुका रूपमा व्याख्या गरेका थिए। शिव तन्त्रलाई वैज्ञानिक दृष्टिकोणबाट प्रस्तुत गर्दै अन्धविश्वास घटाउने प्रयासले उनलाई विशिष्ट बनाएको उल्लेख गरिएको थियो।
यस अवसरमा अखिल भारतीय अखाडा परिषदका अध्यक्ष रबिन्द्र पुरीसहितका सन्तहरूले नयाँ महामण्डलेश्वरको नियुक्तिले सन्त समाजमा सकारात्मक ऊर्जा थपिएको बताएका थिए।

    त्यस्तै, आगामी कुम्भ मेलालाई लक्षित गर्दै धार्मिक गतिविधि अझ सशक्त बनाउने संकेत पनि कार्यक्रममा दिइएको थियो। सहभागी मन्त्रीहरूले कुम्भ मेलालाई भव्य र व्यवस्थित बनाउन तयारी तीव्र पारिएको जानकारी गराए।
    अभिषेकपछि करौली शंकर महादेवले आफूलाई प्राप्त जिम्मेवारीलाई समाज सेवा र धर्म संरक्षणमा केन्द्रित गर्ने प्रतिबद्धता व्यक्त गरे। उनले सम्मानलाई कर्तव्यका रूपमा लिँदै मानव कल्याणमा समर्पित रहने बताए।

   समारोहले सन्त परम्परामा निरन्तरता, नेतृत्व हस्तान्तरण र आध्यात्मिक भूमिकाको पुनःपरिभाषालाई एकैसाथ उजागर गरेको छ।