जीलानिया मदरसा मलंगवामा निःशुल्क स्वास्थ्य सम्पन्न

 

मधेशदूत समाचारदाता
सर्लाही,पुस २८

    मलंगवा नगरपालिकाको आयोजनामा वडा न-३ स्थित जीलानिय मदरशामा आइतवार निःशुल्क स्वास्थ्य शिविर सम्पन्न भएको छ।    
    स्थानीय नागरिकहरूको स्वास्थ्य सेवा पहुँचलाई सहज बनाउने उद्देश्यले आयोजना गरिएको उक्त शिविरमा सर्वसाधारणको उल्लेख्य सहभागिता रहेको थियो। शिविरमा विभिन्न उमेर समूहका नागरिकहरूले निःशुल्क स्वास्थ्य परीक्षण, रोग पहिचान तथा चिकित्सकीय परामर्श सेवा प्राप्त गरेका थिए। सामान्य स्वास्थ्य जाँच, रक्तचाप, मधुमेह, ज्वरो, र अन्य सामान्य रोगसम्बन्धी परीक्षणका साथै परामर्श पनि प्रदान गरिएको थियो। 
  शिविरमा आएका धेरै नागरिकले घरदैलोमै गुणस्तरीय स्वास्थ्य सेवा पाएको भन्दै नगरपालिकाप्रति आभार व्यक्त गरेका छन्।
नगरपालिकाका अनुसार आर्थिक अभाव, दूरी तथा जानकारीको कमीका कारण नियमित स्वास्थ्य परीक्षण गर्न नसक्ने नागरिकहरूलाई लक्षित गरी यस्तो शिविर आयोजना गरिएको हो। नगर क्षेत्रका विपन्न, ज्येष्ठ नागरिक, महिला तथा बालबालिकाले शिविरबाट प्रत्यक्ष लाभ लिएको जनाइएको छ। शिविरलाई सफल बनाउन विभिन्न चिकित्सक, स्वास्थ्यकर्मी तथा स्वयंसेवकहरूको सक्रिय सहभागिता रहेको थियो। उनीहरूले बिहानदेखि साँझसम्म निरन्तर सेवा प्रदान गर्दै नागरिकको स्वास्थ्य जाँच तथा परामर्शमा सहयोग गरेका थिए।
   शिविर समापनका अवसरमा मलंगवा नगरपालिकाका स्वास्थ्य शाखा प्रमुख विष्णुकान्त शाहले शिविर सफलतापूर्वक सम्पन्न गर्न सहयोग गर्ने सम्पूर्ण चिकित्सक, स्वास्थ्यकर्मी, स्वयंसेवक तथा प्रत्यक्ष–अप्रत्यक्ष रूपमा साथ दिने सबैप्रति हार्दिक धन्यवाद व्यक्त गर्नुभयो। उहाँले नगरपालिकाले आगामी दिनमा पनि नागरिकको स्वास्थ्यलाई प्राथमिकतामा राख्दै यस्ता निःशुल्क स्वास्थ्य शिविर तथा जनस्वास्थ्यसम्बन्धी कार्यक्रमलाई निरन्तरता दिने प्रतिबद्धता जनाउनुभयो।
   नगर प्रमुख नागेन्द्र प्रसाद यादवले यस्ता कार्यक्रममार्फत स्थानीयस्तरमै स्वास्थ्य सेवा विस्तार गरी नागरिकको जीवनस्तर सुधारमा योगदान पुर्‍याउने लक्ष्य लिएको बताउनुभयो।